రాజస్థాన్ లో అశ్చర్యం...మనిషి పొట్టలో 116 మేకులు



సాధారణంగా ఇనుప మేకు గుచ్చుకుంటేనే ‘అమ్మా’ అంటాం. అలాంటిది ఏకంగా 116 మేకులు ఆ రాజస్థాన్‌లోకి ఎలా వెళ్లాయో అర్థం కావడంలేదు. కేవలం మేకులేనే పొడవాటి ప్లాస్టివ్ వైరు, ఒక ఇనుప గోలీ. ఇవన్నీ ఎప్పుడు ఎలా మింగేశాడో అతనికే తెలియడంలేదు. ఇదేంటని అడిగితే అతని కుటుంబ సభ్యులు కూడా నోళ్లెల్లబెడుతున్నారు. వివరాలు ఇలా ఉన్నాయి. రాజస్థాన్‌లోని బుండి ప్రాంతానికి చెందిన భోలా శంకర్(42) అనే వ్యక్తి కొద్ది రోజులుగా విపరీతమైన కడుపునొప్పితో బాధపడుతున్నాడు. ఆదివారం కుటుంబ సభ్యులు అతన్ని ప్రభుత్వ ఆస్పత్రికి తీసుకెళ్లారు. 
 
భోళా శంకర్‌ను పరీక్షించిన డాక్టర్ అనిల్ సైని.. అతనికి ఎక్స్‌రే తీయించారు. ఎక్స్‌రే కాపీలో పొట్టలో ఏవో మేకుల ఆకారంలో ఉన్నట్టు గమనించి ఆశ్చర్యపోయారు. నొప్పి తగ్గడానికి మందులు వేసి సోమవారం సీటీ స్కాన్ తీయించారు. దీంతో పొట్టలో మేకులు, మరికొన్ని వస్తువులు ఉన్నట్టు స్పష్టమైంది. మంగళవారం శంకర్‌కు శస్త్రచికిత్స నిర్వహించిన డాక్టర్ అనిల్.. అతని పొట్టలో నుంచి 116 మేకులు, పొడవాటి వైరు, ఇనుప గోలీని బయటికి తీశారు. 
 
శంకర్ పొట్టలో నుంచి బయటికి తీసిన చాలా మేకులు 6.5 సెంటీమీటర్ల పొడవు ఉన్నాయని డాక్టర్ సైని చెప్పారు. శస్త్రచికిత్స చేసి వస్తువులన్నీ బయటకు తీయడానికి గంటన్నర సమయం పట్టిందన్నారు. ప్రస్తుతం రోగి పరిస్థితి నిలకడగా ఉందని, శస్త్ర చికిత్స అనంతరం అతను సాధారణంగానే తమతో మాట్లాడాడని డాక్టర్ వెల్లడించారు. అయితే ఇన్ని మేకులు ఎలా మింగాడో అతను చెప్పలేకపోతున్నాడని తెలిపారు. అతని కుటుంబ సభ్యులు సైతం ఏం జరిగిందో అర్థం కాక నోళ్లెల్లబెడుతున్నారని అన్నారు. ప్రస్తుతం రోగి మానసిక పరిస్థితి సరిగాలేదని, పూర్తిగా కోలుకున్నాక మేకులు ఎలా మింగాడో తెలుసుకుంటామని చెప్పారు.
 
కాగా, ఇలాంటి శస్త్రచికిత్సే కోల్‌కతాలో కూడా జరిగిందని డాక్టర్ సైని వెల్లడించారు. కాకపోతే అక్కడ వ్యక్తి పొట్టలో నుంచి 2.5 సెంటీమీటర్ల పొడవున్న మేకులు తీశారని, శంకర్ పొట్టలోని 6.5 సెంటీమీటర్ల మేకులుండటం ఆశ్చర్యానికి గురిచేస్తుందని అన్నారు. వాటిలో ఒక్క మేకైనా శంకర్ పేగులకు గుచ్చుకుని ఉంటే చాలా ప్రమాదం జరిగి ఉండేదన్నారు. ఇదిలా ఉంటే, 2017 జూలైలో బుండికి చెందిన బద్రిలాల్ (56) అనే వ్యక్తి పొట్టలో నుంచి ఫరీదాబాద్ హాస్పిటల్ డాక్టర్లు 150 సూదులు, మేకులను తొలగించారు.