ఒక్క పరుగు తేడాతో చెన్నైని ఓడించిన ముంబయి...



ఐపిఎల్ 2019 సీజన్‌ ఫైనల్లో ఆఖరి బంతికి ఓడిన చెన్నై సూపర్ కింగ్స్‌పై సోషల్ మీడియాలో అభిమానులు పెద్ద ఎత్తున సెటైర్లు కురిపిస్తున్నారు. ఉప్పల్ వేదికగా ఆదివారం రాత్రి జరిగిన ఫైనల్ మ్యాచ్‌లో.. చెన్నై విజయానికి చివరి ఒక బంతికి రెండు పరుగులు అవసరమవగా.. లసిత్ మలింగ వికెట్ల ముందు శార్ధూల్ ఠాకూర్‌ని ఎల్బీడబ్ల్యూగా దొరకబుచ్చుకున్నాడు. ఫైనల్లో ఒక పరుగు తేడాతో గెలిచిన ముంబయి టీమ్.. నాలుగు సార్లు ఐపీఎల్ టైటిల్ గెలిచిన తొలి జట్టుగా సరికొత్త రికార్డు నెలకొల్పింది. మరోవైపు.. తాజా సీజన్‌లో ముంబయిపై ఆడిన నాలుగు మ్యాచ్‌ల్లోనూ చెన్నై సూపర్ కింగ్స్ ఓడింది. మిడిల్ ఓవర్లలో లేని పరుగు కోసం ప్రయత్నిస్తూ ధోని, చివరి ఓవర్‌లో షేన్ వాట్సన్ రనౌటవడం మ్యాచ్‌లో కీలక మలుపు. 
 
మ్యాచ్‌లో తొలుత కీరన్ పొలార్డ్ (41 నాటౌట్: 25 బంతుల్లో 3x4, 3x6), ఓపెనర్ డికాక్ (29: 17 బంతుల్లో 4x6) నిలకడగా ఆడటంతో 8 వికెట్ల నష్టానికి 149 పరుగులు చేసిన ముంబయి టీమ్.. అనంతరం ఛేదనకు దిగిన చెన్నై టీమ్‌ని 148/7కే పరిమితం చేసింది. ఆ జట్టులో ఓపెనర్ షేన్ వాట్సన్ (80: 59 బంతుల్లో 8x4, 4x6) భారీ ఇన్నింగ్స్ ఆడినా.. చివరి ఓవర్‌లో రనౌటవడంతో మ్యాచ్‌పై ముంబయికి పట్టుచిక్కింది. ఇప్పటికే 2013, 2015, 2017 సీజన్లలో ముంబయి టీమ్‌ టైటిల్ గెలిచిన విషయం తెలిసిందే.