‘కాంచన-3’ మూవీ రివ్యూ....



హారర్, కామెడీ చిత్రాలను ఇష్టపడే ప్రేక్షకులకు ముని, కాంచన సిరీస్ సినిమాల గురించి ప్రత్యేకంగా చెప్పాల్సిన అవసరం లేదు. ప్రేక్షకులను ఓవైపు భయపెడుతూ మరోవైపు కామెడీతో నవ్వించడం ఈ సినిమాల స్పెషాలిటీ. సాటి వారికి సాయం చేసే మంచి వ్యక్తులు స్వార్థపరుల చేతిలో అకారణంగా ప్రాణాలు కోల్పోవడం.. తర్వాత ప్రేతాత్మలుగా మారి ప్రతీకారం తీర్చుకోవడం.. ఇందుకోసం ఓ వ్యక్తి శరీరాన్ని ఆశ్రయించడం... స్థూలంగా కాంచన సిరీస్ సినిమాల కాన్సెప్ట్ ఇదే. కానీ కథనంలో వైవిధ్యం ఈ సినిమాల ప్రధాన బలం. ముని నుంచి మొదలుపెడితే కాంచన, కాంచన-1.. ఇలా అన్ని సినిమాల్లోనూ ఇదే ఫార్ములాను లారెన్స్ ఫాలో అవుతున్నాడు. మరోసారి ఇదే ఫార్ములాతో రాఘవ లారెన్స్ తెరకెక్కించిన కాంచన-3 శుక్రవారం (ఏప్రిల్ 19)న ప్రేక్షకుల ముందుకొచ్చింది. గత చిత్రాల మాదిరిగానే ఈ సినిమా కూడా ప్రేక్షకులను ఆకట్టుకోగలిగిందా లేదా అనేది రివ్యూ ద్వారా తెలుసుకుందాం. 
 
కథ విషయానికి వస్తే.. కాళీ (లారెన్స్) తల్లి రాధమ్మ అనాథ పిల్లల కోసం ఆశ్రమాన్ని నడుపుతుంటుంది. తోటి వారి కడుపు నింపితే మన కడుపు ఆ దేవుడే మన కడుపు నింపుతాడని బలంగా నమ్మే వ్యక్తి ఆమె. ఆశ్రమంలోనే తన కొడుకు కాళీతోపాటు రోజీ అనే ఇంగ్లిష్ పిల్లను కూడా రాధమ్మ పెంచుతుంది. తను ఉండే బస్తీలోని పేదలు, చిన్నపిల్లల ఆకలి తీర్చే మంచి వ్యక్తిగా రాధమ్మకు పేరుంది. ఓ రోజు హఠాత్తుగా ఆమె చనిపోవడంతో.. అమ్మ బాధ్యతలను చిన్నపిల్లాడైన కాళీ భుజానికెత్తుకుంటాడు. అతడికి రోజీ అండగా నిలుస్తుంది. పెద్దయ్యాక ఓ కారణం వల్ల మినిస్టర్ శంకర్ తమ్ముడైన భవానీతో కాళీ గొడవ పడతాడు. దానికి కారణం ఏంటనేది సినిమా చూసి తెలుసుకుంటేనే బాగుంటుంది. 
 
తన ఇగో హర్ట్ చేసిన కాళీపై పగ పెంచుకున్న భవానీ.. కాళీ మనిషిని చంపిస్తాడు. అది భరించలేకపోయిన కాళీ ప్రతీకారంతో ఈ హత్య చేసిన వారిని, అందుకు కారణమైన భవానీని చంపేస్తాడు. తమ్ముడి మరణానికి మినిస్టర్ ప్రతీకారం తీర్చుకోవాలని భావిస్తాడు. అదును చూసి కాళీ నడిపే ట్రస్టును తగలబెట్టించడంతోపాటు కాళీని, రోజీని చంపించి యాక్సిడెంట్‌గా చిత్రీకరిస్తాడు. ఇలా చనిపోయిన కాళీ, రోజీలు ప్రేతాత్మలుగా మారి రాఘవ (లారెన్స్) శరీరంలో ప్రవేశించి ప్రతీకారం తీర్చుకుంటారు. 
 
దెయ్యాలంటే భయపడే యువకుడైన రాఘవ పాత్రలోనూ లారెన్స్ నటించాడు. అతడి తల్లి పాత్రలో కోవై సరళ, వదినగా దేవదర్శిని, అన్నగా శ్రీమాన్ నటించారు. రాఘవ మరదళ్లుగా ఓవియా, వేదిక, నిక్కీ తంబోలి రొమాన్స్ పండించే ప్రయత్నం చేశారు. కాళీ, రాఘవ పాత్రల్లో లారెన్స్ వైవిధ్యం కనబరిచాడు. తొలి భాగంలో అమ్మమ్మ-తాతయ్యల షష్టి పూర్తి కోసం అమ్మ, అన్నావదినలతో సహా రాఘవ వరంగల్ వెళ్తాడు. మధ్యలో ఓ చెట్టు కింద కూర్చోని భోజనాలు చేసే క్రమంలో వీరికి తెలియకుండా కాళీ, రోజీ ఆత్మలు వీరితో చేరతాయి. అమ్మమ్మ వాళ్లింటికి చేరాక హీరోయిన్ల క్యారెక్టర్లు పరిచయం అవుతాయి. రాత్రిళ్లు వింత ఆకారం ఇంట్లోవాళ్లను భయపెట్టే సీన్లలో ప్రేక్షకులు ఓవైపు భయపడుతూనే, మరోవైపు నవ్వుకుంటారు. అఘోరా సలహాపై పూజలతో ఇంట్లో దెయ్యం ఉందనే ట్విస్టుతో ఫస్టాఫ్ ముగుస్తుంది. ఫస్టాప్‌లో కామెడీ, హారర్ పండినప్పటికీ.. కాంచన సిరీస్ సినిమాలతో పోలిస్తే పెద్ద వైవిధ్యం లేదు. 
 
సెకండాఫ్‌లో రాఘవ శరీరంలోకి కాళీ, రోజీల ఆత్మలు చేరతాయి. కాళీ గతం తెలుసుకున్న ఇంట్లోవాళ్లు రాఘవ శరీరం ద్వారా పగ తీర్చుకోవడానికి అంగీకరిస్తారు. తొలి భాగంలో కామెడీ, హారర్ ఉంటే.. మలి అర్ధభాగంలో సెంటిమెంట్ ఉంటుంది. కాళీ తల్లి చనిపోయే సీన్, పిల్లల ఆకలి తీర్చే సన్నివేశం.. ఇలా కొన్ని సీన్లు టచ్ చేస్తాయి. లారెన్స్ మార్క్ యాక్షన్ సీన్లకు కొదవ లేదు. ముగ్గురు హీరోయిన్లు ఉన్నప్పటికీ.. వారి పాత్రలు గ్లామర్‌కే పరిమితమయ్యాయి. గత చిత్రాల మాదిరిగానే కోవై సరళ నవ్వించింది. సినిమా మొత్తానికి బలం లారెన్స్ నటన. రాఘవ, కాళీ పాత్రల్లో లారెన్స్ మంచి నటన కనబరిచాడు.
 
అతడి దర్శకత్వం కూడా బాగుంది కానీ యాక్షన్ సీన్లపై పెట్టిన శ్రద్ధ.. హారర్ సీన్లపై పెట్టలేకపోయాడు అనిపిస్తుంది. మిగతా సిరీస్‌ల మాదిరిగానే కాంచన-3 కూడా ఉండటం కాస్త రొటీన్‌గా అనిపిస్తుంది. కాంచన సిరీస్ ఫార్ములాకు మరి కాస్త మార్పులు చేసి ఉంటే బాగుండేది అనిపిస్తుంది. తమన్ అందించిన బ్యాక్ గ్రౌండ్ మ్యూజిక్ బాగుంది. తమిళ వాసనలు ఉండటం, పాటలు బాగోలేకపోవడం, నిడివి ఎక్కువగా ఉండటం, కొన్ని చోట్ల అతిగా అనిపించడం ఈ సినిమాలో మైనస్ పాయింట్లు. మాస్ సినిమాలను ఇష్టపడే వారికి ఈ సినిమా నచ్చుతుంది. హారర్‌తో కూడిన కామెడీని ఇష్టపడే వారు కాంచన-3 చూడొచ్చు.