పాక్ తో మ్యాచ్‌పై స్పందించిన విరాట్..!



ప్రపంచకప్‌లో దాయాది పాకిస్థాన్‌తో మ్యాచ్‌ ఆడటంపై భారత కెప్టెన్ విరాట్ కోహ్లీ స్పందించాడు. ఆస్ట్రేలియాతో విశాఖపట్నం వేదికగా ఆదివారం రాత్రి 7 గంటలకి తొలి టీ20 మ్యాచ్ జరగనుండగా.. ఈరోజు మీడియాతో విరాట్ కోహ్లీ మాట్లాడాడు. ఈ సందర్భంగా పుల్వామా ఉగ్రదాడి, పాకిస్థాన్‌తో మ్యాచ్ గురించి ప్రశ్నించగా.. భారత క్రికెట్ నియంత్రణ మండలి (బీసీసీఐ), ప్రభుత్వం తీసుకునే నిర్ణయానికి తాము కట్టుబడతామని కోహ్లీ సమాధానమిచ్చాడు. ఇంగ్లాండ్ వేదికగా మే 30 నుంచి ప్రపంచకప్ మొదలుకానుండగా.. షెడ్యూల్ ప్రకారం జూన్ 16న భారత్, పాకిస్థాన్ జట్లు తలపడనున్నాయి. అయితే.. ఈ మ్యాచ్‌ను బహిష్కరించాలని దేశవ్యాప్తంగా పెద్ద ఎత్తున డిమాండ్లు వినిపిస్తున్నాయి. 
 
‘పుల్వామా ఉగ్రదాడిలో అసువులు బాసిన అమర జవాన్ల కుటుంబాలకి ప్రగాఢ సానుభూతి తెలియజేస్తున్నాను. దేశ ప్రజల మనోభావాల్ని గౌరవిస్తున్నాం. అలానే మేము మ్యాచ్ ఆడాలా..? వద్దా..? అనేది బీసీసీఐ నిర్ణయిస్తుంది. ఏది ఏమైనా.. ప్రభుత్వం, బీసీసీఐ నిర్ణయాన్ని మేము గౌరవిస్తాం’ అని విరాట్ కోహ్లీ వెల్లడించాడు. భారత్ జట్టు ఒకవేళ పాక్‌తో మ్యాచ్‌ను బహిష్కరిస్తే..? అప్పుడు పాకిస్థాన్‌ను విజేతగా ప్రకటించి రెండు పాయింట్లు కేటాయిస్తారు. అదే జరిగితే ఇప్పటి వరకూ ప్రపంచకప్‌లో భారత్‌పై ఒక్కసారి కూడా గెలుపొందని పాకిస్థాన్‌ను చేజేతులా మనమే తొలిసారి గెలిపించినట్లవుతుందని దిగ్గజ క్రికెటర్లు సచిన్ టెండూల్కర్, సునీల్ గవాస్కర్‌లు గుర్తు చేశారు. అలాకాకుండా.. మరోసారి పాక్‌ని ఓడించాలని వారిద్దరూ సూచించారు.