స్మిత్‌పై వేటు కోహ్లికి కలిసొచ్చిందిలా!



 
ఐసీసీ అవార్డుల్లో విరాట్ కోహ్లి హ్యాట్రిక్ సాధించాడు. ఐసీసీ క్రికెట్ ఆఫ్ ది ఇయర్‌గా నిలిచిన విరాట్.. గ్యారీ సోబెర్స్ అవార్డును సొంతం చేసుకున్నాడు. ఐసీసీ వన్డే ప్లేయర్, ఐసీసీ టెస్ట్ ప్లేయర్ అవార్డులను సైతం కోహ్లి సొంతం చేసుకున్నాడు. తద్వారా ఒకే ఏడాది ఈ మూడు అవార్డులను దక్కించుకున్న తొలి ఆటగాడిగా కోహ్లి చరిత్ర సృష్టించాడు. గత ఏడాది ఐసీసీ టెస్టు ప్లేయర్ మినహా మిగతా రెండు అవార్డులను కోహ్లి సొంతం చేసుకున్నాడు. టెస్టు ప్లేయర్‌ అవార్డును నాటి ఆస్ట్రేలియా స్టీవ్ స్మిత్ సొంతం చేసుకున్నాడు. 
 
బాల్ ట్యాంపరింగ్ కారణంగా క్రికెట్ ఆస్ట్రేలియా స్మిత్‌పై ఏడాది వేటేయడం కోహ్లికి కలిసొచ్చింది. ఐసీసీ టెస్టు ప్లేయర్‌గా నిలవడానికి తన ఆటతీరే కారణమైనప్పటికీ.. స్మిత్ గైర్హాజరీ కూడా విరాట్‌కు ఉపయోగపడింది. 2017లో టెస్ట్ ప్లేయర్‌గా నిలిచిన స్మిత్.. టెస్టుల్లో అగ్రస్థానంతో ఆ ఏడాదిని ముగించాడు. 947 పాయింట్లతో బ్రాడ్‌మన్ (961) తర్వాత అత్యధిక రేటింగ్ పాయింట్లు సాధించిన ఆటగాడిగా చరిత్ర సృష్టించాడు. గత ఏడాదితో పోలిస్తే 2017లోనే కోహ్లి టెస్టుల్లో ఎక్కువ పరుగులు సాధించాడు. కానీ విరాట్ కంటే మిన్నగా స్మిత్ ఆడాడు. 
 
గత ఏడాది మార్చిలో దక్షిణాఫ్రికా పర్యటనలో బాన్‌క్రాఫ్ట్ బాల్ ట్యాంపరింగ్‌కు పాల్పడటం.. తదనంతర పరిణామాలతో స్మిత్, వార్నర్‌లపై ఏడాదిపాటు నిషేధం వేటు పడింది. దాదాపు 9 నెలలపాటు ఆటకు దూరమైనా స్మిత్ ఐసీసీ టెస్ట్ ర్యాంకింగ్స్‌లో టాప్-5లో నిలిచాడంటే అతడి ఆట ఏ స్థాయిలో ఉందో అర్థం చేసుకోవచ్చు. స్మిత్‌పై నిషేధం వేటు పడిన తర్వాత.. గత ఏడాది ఆగష్టులో కోహ్లి టెస్టుల్లో అగ్రస్థానానికి చేరుకోగలిగాడు. స్మిత్ 2018లోనూ క్రికెట్ ఆడి ఉంటే.. టెస్టు ప్లేయర్ రేసులో విరాట్‌కి గట్టి పోటీ ఇచ్చేవాడు అనడంలో ఎలాంటి సందేహం లేదు.